Өвлийн жавар арилж, хаврын нар наашлан дэлгэр Монгол нутагт сар шинийн баяр тун удахгүй тохиох гэж байна. Монгол түмний уламжлалт цагаан сарын баярыг тохиолдуулан дүүргийн удирдлагууд 5 дугаар хорооны 90-ээс дээш насны өндөр настан, азай буурлууддаа гэрт нь очиж, хүндэтгэл үзүүлэн гарын бэлэг гардууллаа.
Дүүргийн хэмжээнд 90-ээс дээш насны 17 ахмад настан байдаг бол 100-аас дээш насны нэг буурай байдаг байна.
Налайх дүүргийн ИТХ-ын дарга Б.Нэргүй, Засаг дарга Ч.Раднаабазар, Засаг даргын орлогч Х.Анхбаяр, 5 дугаар хорооны Засаг дарга Д.Мөнхбаяр нар 106 настай Балчингийн Хожоо гуайд Монгол Улсын Ерөнхийлөгч болон дүүргийн Засаг даргын гарын бэлэг, 91 настай Бэгзийн Бодьгэрэл, 92 настай Жамбалын Доржсүрэн нарт дүүргийн Засаг даргын гарын бэлгийг гардуулан өгч, хүндэтгэл үзүүллээ.
Настан буурлууд дүүргийн удирдлагуудад хандаж “Төр нь түвшин сайхан, түмэн олон нь амгалан” байхын ерөөл дэвшүүллээ.