Аж үйлдвэрийн Ууган голомт Нийслэлийн Налайх дүүрэгт Цагдаагийн алба үүсч байгуулагдсаны 80 жилийн ойн баярыг тохиолдуулан тус дүүрэгт ажиллаж гэмт хэргийг илрүүлэх, урьдчилан сэргийлэх, нийтийн хэв журмыг хангах ариун үйлсэд эрдэм мэдлэг, оюун ухаан, авъяас чадвараа зориулж ирсэн үе үеийн ахмадууд, одоо ажиллаж байгаа офицер, ахлагч ажилтан та бүхэнд болон та бүгдийн гэр бүл, үр хүүхэд, төрөл төрөгсдөд дүүргийн ИТХ-ын Төлөөлөгчдийн нэрийн өмнөөс болон хувиасаа чин сэтгэлийн мэндчилгээ дэвшүүлье.

Налайх дүүргийн Цагдаагийн хэлтэс орон нутгийнхаа хөгжил дэвшилтэй уялдан үйл ажиллагааныхаа шинэчлэлийг эрчимтэй явуулж, хуулиар хүлээсэн гэмт хэрэгтэй тэмцэх, нийтийн хэв журмыг хамгаалах, олон нийтийн аюулгүй байдлыг хангах үүргээ ухамсарлан, цагийн хязгаар, биеийн алжаалыг умартан, шаргуу хөдөлмөрлөж, иргэдээ амар тайван байлгахын төлөө хичээн зүтгэж байгаад талархал илэрхийлье.

Дүүргийн ИТХ нь цагдаагийн байгууллагын үйл ажиллагааг дэмжин, орчин үеийн техник хэрэгслээр ханган бэхжүүлэх, алба хаагчдын мэдлэг боловсрол, ур чадварыг сайжруулах, амьдрах нөхцөл, нийгмийн баталгааг дээшлүүлэх олон талт арга хэмжээнүүдийг шат дараатай хэрэгжүүлэн, тодорхой бодлого, зорилтыг дэвшүүлэн ажиллаж байна.

Дүүргийнхээ иргэдийн аюулгүй амьдрах орчныг бүрдүүлэхийн тулд Цагдаагийн хэлтсийн бие бүрэлдэхүүн хуулийг чанд мөрдөж, хүний эрх, эрх чөлөөг дээдлэн хүндэтгэж, иргэдэд үзүүлэх ажил үйлчилгээний чанар, үр дүнг ахиулж, олон нийттэй хамтын ажиллагааг бэхжүүлэн ажиллана гэдэгт итгэлтэй байна.