Налайх дүүргийн Гэмт хэргээс урьдчилан сэргийлэх ажлыг зохицуулах салбар зөвлөлийн санаачилгаар үүсгэн байгуулагдсан ерөнхий боловсролын сургуулиудын JUSTICE CLUB-ийн сурагчдад зориулсан уулзалт, сургалтыг 2025 оны 12 дугаар сарын 24-ны өдөр зохион байгууллаа.

Тус сургалтын зорилго нь Налайх дүүргийн ерөнхий боловсролын сургуулийн сурагчид болон Налайх Политехник коллежийн оюутнуудыг шударга ёсны үзэл баримтлалд тулгуурлан хууль эрх зүйн мэдлэгийг дээшлүүлэх, цаашид хуульч мэргэжлийг сонгон суралцах сонирхолтой хүүхдүүдийг дэмжих, улмаар нийт сурагч, оюутнуудад ирээдүйд шударга нийгмийг бий болгох хүсэл эрмэлзлийг төлөвшүүлэхэд оршсон юм.

Уулзалт, сургалтыг нээж дүүргийн иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Н.Мандуул үг хэлж, сурагчдад хандан шударга ёс, хууль дээдлэх зарчим, иргэн хүний үүрэг хариуцлагын талаар онцлон тэмдэглэн, залуу үеийг нийгмийн зөв үнэт зүйлтэй, хариуцлагатай иргэн болон төлөвших нь чухал болохыг уриаллаа.

Сургалтад ГХУСАЗСЗ-ийн урилгаар:

• Дүүргийн иргэдийн Төлөөлөгчдийн Хурлын Төлөөлөгч З.Нарангэрэл “Шударга чанар ба ялгах чадвар” сэдвээр,

• Төслийн зохицуулагч Б.Тэмүлин “Дэлхийн зөн Монгол” ОУБ-ын Хүүхэд хамгааллын компакт төслийн хүрээнд хэрэгжиж буй Өсвөрийн клубын танилцуулга сэдвээр тус тус сургалт, мэдээлэл хийж оролцлоо.

Сургалтын үеэр сурагчид шударга ёсны ойлголт, хүний эрх, үүрэг хариуцлага, хууль дээдлэх соёлын талаар бодит жишээн дээр суурилсан мэдээлэл авч, үе тэнгийнхний эерэг манлайллыг дэмжих, зөрчил маргаанаас урьдчилан сэргийлэх арга барилд суралцсан юм.

Тус уулзалт, сургалт нь JUSTICE CLUB-ийн сурагчдыг идэвхжүүлэх, хууль эрх зүйн мэдлэгтэй, зөв хандлагатай иргэнийг төлөвшүүлэх, цаашид шударга, хариуцлагатай нийгмийг бүтээхэд чиглэсэн бодитой алхам боллоо.