Орон нутгийн шийдвэр гаргах түвшинд ажиллаж буй удирдлага, албан хаагчдын мэдлэг, ур чадварыг дээшлүүлэх, хөгжлийн бодлогын шинэ чиг хандлагатай танилцуулах, манлайлал, хамтын ажиллагааг дэмжих, харилцан туршлага солилцох зорилгоор дүүргийн иргэдийн Төлөөлөгчдийн Хурлын Төлөөлөгчид, ИТХ-ын Ажлын алба, Засаг даргын Тамгын газрын ажилтан, албан хаагчдыг хамруулсан чадавхжуулах сургалтыг зохион байгууллаа.Сургалтыг нээж дүүргийн иргэдийн Төлөөлөгчдийн Хурлын дарга Н.Мандуул үг хэлж, орон нутгийн хөгжлийг үр дүнтэй төлөвлөх, бодлогын шийдвэрийг оновчтой гаргахад төлөөлөгчид, албан хаагчдын манлайлал, ёс зүй, хариуцлага, хамтын ажиллагаа чухал болохыг онцлон тэмдэглэлээ.Чадавхжуулах сургалтын хүрээнд дараах сэдвүүдээр мэдээлэл, илтгэл танилцууллаа. Үүнд:
• “Өөрчлөлтөд бэлэн үү” сэдвээр сургагч багш А.Адилбиш өөрчлөлтийн менежмент, хувь хүний болон байгууллагын сэтгэлгээний шинэчлэл, манлайллын ур чадварын талаар мэдээлэл өглөө.
• “Авилгын эсрэг хууль, нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль, Эрүүгийн хууль” сэдвээр Доктор, дэд профессор А.Алтанзул хууль, эрх зүйн орчны шинэчлэл, нийтийн албан хаагчдын хариуцлага, ёс зүйн асуудлын талаар дэлгэрэнгүй тайлбарлав.
• Монгол Улсын бүсчилсэн хөгжлийн бодлого: Налайх, Багануур, Багахангай дүүргийн хөгжлийн бодлого, төлөвлөлт сэдвээр Бүсчилсэн хөгжлийн үндэсний хүрээлэнгийн Орон зайн өгөгдөл, судалгааны газрын ахлах мэргэжилтэн Б.Дэлгэрмаа бүс нутгийн хөгжлийн чиг хандлага, төлөвлөлтийн онцлог, орон нутгийн уялдаа холбооны талаар мэдээлэл өглөө.
• “Хамтын уураг тархи” сэдвээр Harvard Managementor хөтөлбөрийн зохицуулагч Д.Асралт багаар ажиллах чадвар, хамтын шийдвэр гаргалт, бүтээлч сэтгэлгээг хөгжүүлэх арга зүйг танилцууллаа.
Сургалтын явцад оролцогчид хэлэлцүүлэг өрнүүлж, санал бодлоо солилцон, бодит туршлага дээр тулгуурласан асуулт, хариулт, дасгал ажил хийснээр сургалтын үр өгөөжийг нэмэгдүүлсэн юм.Энэхүү чадавхжуулах сургалт нь дүүргийн ИТХ-ын Төлөөлөгчид, албан хаагчдын мэдлэг, ур чадварыг дээшлүүлж, орон нутгийн бодлого, шийдвэр гаргалтыг илүү оновчтой, ил тод, үр дүнтэй хэрэгжүүлэхэд чухал ач холбогдолтой арга хэмжээ боллоо.
