Чингэлтэй дүүргийн Иргэдийн Төлөөлөгчдийн Хурлын ажлын албанаас 9 дүүргийн Иргэдийн Төлөөлөгчдийн Хурлын байгууллагын хамтын ажиллагааг өргөжүүлэх, харилцан туршлага солилцох, сайн туршлагыг түгээн дэлгэрүүлэх, шинэ санаа санаачилгыг дэмжих замаар Нутгийн өөрөө удирдах байгууллагын чадавхийг бэхжүүлэх, төлөвшүүлэх зорилгоор 2018 оны 01 дүгээр сарын 17-ны өдөр “ХАМТДАА СУРАЛЦЪЯ-ХАМТДАА ХӨГЖЬЕ” туршлага солилцох уулзалт, зохион байгууллаа.
Уулзалтад Чингэлтэй дүүргийн ИТХ-ын дарга Д.Бат-Эрдэнэ, ИТХ-ын Тэргүүлэгчдийн нарийн бичгийн дарга бөгөөд Хурлын ажлын албаны дарга Ц.Алтанцацрал, ИТХ-ын Ажлын албаны Удирдлага зохион байгуулалтын хэлтсийн дарга Ж.Ганбат, Иргэний оролцоо, Олон нийттэй харилцах хэлтсийн дарга Т.Уламбаяр, Нийслэлийн 9 дүүргийн ИТХ-ын Нарийн бичгийн дарга бөгөөд, Хурлын ажлын албаны дарга нар оролцов. Уулзалтад ирсэн зочид ИТХ-ын хороод, Гэмт хэргээс урьдчилан сэргийлэх ажлыг зохицуулах салбар зөвлөл, Хороодын Иргэдийн нийтийн Хурлын дарга нарын ажиллах туршлага гэх мэт цаашид хийж хэрэгжүүлэх, төлөвлөгөөндөө тусгах, санаа авах олон сайхан ажлууд байгааг дурдаад цаашид дүүргүүдийн ИТХ-ын ажлын алба хамтран ажиллаж, мэдээлэл солилцож байх талаар санал солилцов.
Энэ үеэр 9 дүүргийн ИТХ-ын 27 албан хаагчдын дунд 3 үе шаттай Караоке тэмцээн зохион байгуулагдаж, 1-р байр Баянгол дүүрэг, 2-р байр Налайх дүүрэг, 3-р байр Чингэлтэй дүүрэг тус тус эзэллээ.
