Нийслэлийн иргэдийн Төлөөлөгчдийн Хурлын даргын урилгаар Тайландын Вант улсын Бангкок хотын иргэдийн Төлөөлөгчдийн Хурлын дэд дарга Нирундэ Прадиткул тэргүүтэй төлөөлөгчид 2017 оны 04-р сарын 22,23-ны өдөр Налайх дүүрэгт албан ёсны айлчлал хийж, дүүргийн удирдлагуудтай уулзлаа.
Уулзалтад дүүргийн Иргэдийн Төлөөлөгчдийн Хурлын дарга Б.Нэргүй, тэргүүлэгчдийн нарийн бичгийн дарга бөгөөд ажлын албаны дарга А.Булбул, Засаг дарга Ч.Раднаабазар, Засаг даргын орлогч Х.Анхбаяр нар оролцов.
Энэ жил Монгол, Тайланд хоёр улс дипломат харилцаа тогтоосны 43 жилийн
ой, Бангкок, Улаанбаатар хотын хурал хооронд ах дүүгийн харилцаа
байгуулсны 18 жилийн ой тохиож байна.
Хоёр улсын харилцаа, хамтын
ажиллагааг гүнзгийрүүлэн хөгжүүлэхэд нийслэл хотуудын харилцаа, хамтын
ажиллагаа чухал үүрэг гүйцэтгэдэг. 1999 оны 11-р сарын 29-ний өдөр
НИТХ-ын дарга Ц.Баасандорж Бангкок хотод айлчилж гэрээнд гарын үсэг
зурснаар 2 орны хурлын ах дүүгийн харилцааны эхлэл тавигдсан юм. 2011
онд Бангкок хотын ИТХ-ын дарга Улаанбаатарт айлчилж, хамтын ажиллагааны
Санамж бичигт гарын үсэг зурсан.
Налайх дүүргийн удирдлагууд 2017 оны 04-р сарын 22-ны өдрийн уулзалтын үеэр Бангкок хотын ИТХ-ын дэд дарга, төлөөлөгчдөд хандаж Монгол Тайланд хоёр орны хамтын ажиллагааг улам гүнзгийрүүлэн тэлж, аялал жуулчлал, ногоон байгууламж, уламжлалт бариа засал, эрүүл мэндийн үйлчилгээний чиглэлээр мэргэжилтэн бэлтгэх талаар харилцан санал солилцож, хоёр орны найрсаг, харилцан бие биеэ хүндэтгэсэн олон талт хамтын ажиллагааг цаашид улам өргөжүүлэн хөгжүүлэхийг хүслээ.
Тус айлчлалаар Тайландын Вант улсын Бангкок хотын иргэдийн Төлөөлөгчдийн Хурлын дэд дарга Нирундэ Прадиткул тэргүүтэй төлөөлөгчид байгалийн үзэсгэлэнт газар Горхи тэрэлжийн цогцолбор, Цонжин болдогийг үзэж сонирхож, Казак үндэстний айл, тэдний соёл, ёс заншилтай танилцлаа.
НАЛАЙХ ДҮҮРГИЙН ИРГЭДИЙН ТӨЛӨӨЛӨГЧДИЙН ХУРАЛ
